En  arqueoloxía sobresaen dous grandes penedos na beira do río Lérez que rodaron dende o alto e que teñen inscripcións rupestres e tamén o Castro de tempos protohistóricos no lugar de Vilariño.

Interesante é tamén o portón da casa dos Taboada, coa figura de Santa Bárbara e dous Gardas Civís, obra dos Ramos, de Pontevedra.

Folgoso ten moita riqueza natural e paisaxística, grandes carballeiras cheas de vexetación e castiñeiros, abeleiras, salgueiros, bidueiros e outras moitas castas de árbores formando un fermoso conxunto de variadas cores.

O monumento máis destacable desta parroquia é a Igrexa parroquial que se levanta sobre o primitivo templo románico fundado por Carboeiro. Tamén hai dous cruceiros, un no campo das procesións, tallado con grande expresividade polo mestre José Benito de Castro, e outro situado na banda esquerda da estrada xeral de Pontevedra a Ourense coa imaxe de San Antón.

É singular o lugar de Esbarrela situado na parte sur da parroquia a carón do río nun terreo moi inclinado. Ainda que hoxe está case despoboado, destaca pola súa riqueza natural e paisaxística.