A  parroquia de San Xoán Bautista de Cerdedo ten unha poboación de 935 habitantes, repartidos nas entidades de Abelaíndo, Arén, Barro, Cabenca, Carballás, Cavadosa, Cerdedo, Cernados, Chamadoira, O Coteliño, Limeres, Lourido, Meilide, Revolta, San Bernabé e Viduído.

Bañan á  parroquia o río Lérez e os seus afluentes, que con augas cristalinas permiten a localización do rápido viaxar das súas abundantes troitas, dispoñendo para os aficionados á pesca dos cotos de pesca de Cerdedo nos ríos Lérez e Castro.

Cerdedo, integrado na comarca de Terra de Montes, formaba parte no século VI da Diócese de Iria. En 1115, dona Urraca otorgou a Xelmírez o señorío absoluto destas terras que formaban parte do actual municipio. Desta terra xurdiron os primeiros caudillos populares na loita contra os franceses, pagando por iso co incendio do templo de Castro e o arraso da parroquia de Quireza.

No patrimonio artístico é destacable a igrexa parroquial de San Xoán Bautista, que se atopa no centro do pobo xunto coa praza de Don Fernando García Leiro.  A igrexa comezouse a construír o 1 de abril de 1779 e remataríase dous anos despois. Trátase dunha igrexa de estilo Neoclásico, bóvedas de arista, fermosa cúpula e fachada barroca, gardando no seu interior imaxes de impresionante realismo como a chamada Ecce-homo de Gambino e outros pasos de Semana Santa de Antón Ferreiro. Esta construcción costou 75.000 reais de vellón.

Destácase a magnífica imaxe do patrón San Xoán Bautista, feita en pedra de máis de medio metro de altura, obra exclusiva do mestre de arquitectura e escultura  Xosé Nieto, un dos máis grandes da Terra de Montes, nacido en Cerdedo en 1730. No mesmo conxunto arquitectónico atopamos a Rectoral, de estilo barroco do século XVIII. Na orixe, a casa comunicaba coa igrexa por medio dun corredizo, actualmente inexistente aínda que quedan vestixios do mesmo tanto na capela maior como na rectoral.

No acceso á praza de Don Fernando García Leiro atopámo-lo barrio de Torrente, que aínda conserva unha calzada medieval empedrada que conduce á Ponte de San Antón.

O conxunto de San Antón consta dunha ponte románica do século XIII duns 31 metros de lonxitude, con esquema triangular e arcos de medio punto. Cruzando a ponte, accedemos á capela do mesmo nome, do século XVI. 

A porta é de arco adintelado, enriba unha peana co santo, espadaña central dun vano no remate; no interior vese unha bóveda de cañón dun só tramo.
Diante da capela sitúase un cruceiro que ten uns 6 metros de alto e no pedestal, pola parte de diante ten un peto de ánimas e unha iscripción na que só se dá lido "...ofrecieron esta ...". Atópase en bó estado de conservación.
 

Dentro do patrimonio cultural destacamo-los numerosos muíños que se atopan nun treito do río Lérez. Esta zona, chamada polos veciños "os muíños", está situada ó final dun camiño estreito que está na man dereita da Ponte Valoutas.

Neste lugar hai sete muíños dos que destacan o Muíño de Rosendo, antigo aserradeiro, o Muíno dos Netos, aínda en funcionamento e o Muíño dos Santeses.

Tamén destacamos dúas eiras, a máis singular delas é a Eira da Pena situada na outra aldea. Trátase dunha concentración de canastros onde antigamente a xente mallaba o centeo. No barrio das Longas atópase a segunda eira, chamada Eira dos Netos, actualmente moi descoidada.

Fai uns corenta anos en Cerdedo celebrábanse numerosas festas, e se ben hoxe algunhas se perderon outras estanse a recuperar, como a festa de San Pedro que se volve a celebrar dende hai uns anos. A  festa de San Pedro é o 29 de Xuño, celébrase cunha misa solemne no barrio de San Pedro, logo os veciños van comer á carballeira do mesmo nome e pola noite hai unha gran festa.

Outra das festas celebradas é a de San Xoán, patrón de Cerdedo. Celébrase cunha sardiñada e unha churrascada patrocinada polo concello para tódolos veciños,  e ás doce da noite préndese a tradicional fogueira para espanta-las meigas.

Nembargantes, a  festa máis importante da parroquia é o Ecce Homo. Celébrase dúas veces no ano, en inverno o domingo anterior ó entroido, con novena durante toda a semana e o sábado e  domingo con misas solemnes. No verán celébrase de igual xeito, pero con verbenas pola noite os últimos venres, sábado e domingo do mes de xullo. A celebración do verán é moi importante pola súa procesión coas imaxes do divino Ecce-Homo, da Virxe das Dores e da Cruz do Desencravo, asistindo os devotos vestidos cun hábito de Nazareno. Ten moita devoción e asistencia.

Como fillos ilustres   de Cerdedo temos o Pai Martín Sarmiento que viviu no pazo de Raposeiras en Meilide, o párroco Fernando García Leiro que fundou a rectoral e intentou facer un asilo e Pedro de Arén, mestre arquitecto das torres da catedral de Ourense.

Esta parroquia é moi rica dende o punto de vista arqueolóxico: achádegos do neolítico, numerosos dólmenes, petroglifos nas ladeiras do Lérez, castros e restos de calzadas románicas. Parte destes restos foron estudiados por Bouza Brey e por Álvarez Limeres.